កំពង់ស្ពឺ៖ នាយរងប៉ុស្តិ៍នគរបាលរដ្ឋបាលឃុំព្រះស្រែម្នាក់ គឺលោក ភឺន ដេត ត្រូវបានរងការចោទប្រកាន់ពីពលរដ្ឋចំនួន ៥នាក់ដែលបានធ្វើពាក្យបណ្ដឹងប្តឹងលោកថាបានប្រើហិង្សា និងឃាត់ខ្លួនពួកគេ ហើយចោទប្រកាន់ថាពួកគេបានជេរប្រមាទសមត្ថកិច្ច និងចោទថាជាមុខសញ្ញាប្រើប្រាស់សារធាតុញៀន។

នាថ្ងៃទី៩ ខែមករា ពលរដ្ឋចំនួន ៥នាក់ បានសរសេរពាក្យបណ្តឹងផ្ញើទៅសម្តេចក្រឡាហោម ស ខេង ប្តឹងលោកនាយរងប៉ុស្តិ៍នគរបាលរដ្ឋបាលឃុំព្រះស្រែ លោក ភឺន ដេត ក្រោយពីលោកបានចោទប្រកាន់មកលើពួកគេដែលកំពុងតែអង្គុយជួបជុំហូបចុកក្នុងក្រុមគ្រួសារនៅយប់ថ្ងៃទី០៧ ខែមករា ឆ្នាំ២០២៣ ថាពួកគេជាអ្នកជេរមកសមត្ថកិច្ចទាំងដែលពួកគេមិនបានប្រព្រឹត្តទាល់តែសោះ។

ក្នុងលិខិតពាក្យបណ្តឹងនោះបញ្ជាក់ថា នាយរងប៉ុស្តិ៍នោះបាននាំខ្លួនពួកគេមកអធិការដ្ឋាននគរបាលស្រុកឧដុង្គដើម្បីពិនិត្យទឹកនោមរកសារធាតុញៀន លុះលទ្ធផលអវិជ្ជមាន ទើបលោក ភឺន ដេត បានព្រមដោះលែងឱ្យពួកគេត្រឡប់ទៅវិញ។

ក្រោយទទួលបានព័ត៌មាននេះ ស្នងការនៃស្នងការនគរបាលខេត្ដកំពង់ស្ពឺ លោក សម សាមួន បានបញ្ជាឱ្យជំនាញព្រហ្មទណ្ឌចុះទៅមូលដ្ឋានស្រុកឧដុង្គដើម្បីធ្វើការស្រាវជ្រាវទោះបីជាមិនទាន់ទទួលបានបណ្ដឹងណាមួយជាក់លាក់ដោយផ្ទាល់ពីជនរងគ្រោះទាំង៥នាក់ ដែលបានផ្ញើបណ្ដឹងតាមរយៈបណ្ដាញសង្គមក្ដី ក៏សមត្ថកិច្ចស្នងការដ្ឋានត្រូវតែចុះស្រាវជ្រាវស៊ើបបញ្ជាក់ករណីនេះដែរ។

ស្នងការខេត្តកំពង់ស្ពឺបានបញ្ជាក់ឱ្យដឹងថា ជាក់ស្ដែង នាយរងប៉ុស្តិ៍នគរបាលរដ្ឋបាលឃុំព្រះស្រែលោក ភឺន ដេត ត្រូវបានស្នងការ ដកយកមកនៅស្នងការដ្ឋាននគរបាលខេត្ដកំពង់ស្ពឺ ជាបណ្ដោះអាសន្នសិន ដើម្បីទុកឱ្យសមត្ថកិច្ចស្រាវជ្រាវបន្តទៀត៕